АЛЕЙ САЛАТНЫ З МАЦЯРДУШКАЙ
-алей раслінны - 500 г
-мацярдушка звычайная (зеляніна сушоная) - 20 г
-зеляніна пятрушкі сушоная - 5 г
-перац салодкі сушоны - 1 ст. лыжка
-цукар пясок - 1 ст. лыжка
-воцат фруктовы - 100 г
Мацярдушку здрабніць і заліць алеем. Вытрымаўшы 1 тыдзень, працадзіць праз тканіну. Зеляніну пятрушкі і салодкі перац здрабніць у парашок, прасеяць і заліць фруктовым воцатам, дадаць цукровы пясок. Вытрымаць 4 гадзіны, змяшаць з працэджаным алеем, заліць у бутэльку і добра ўзбоўтаць.
Беларускія\ прыказкі і прымаўкі.
• Дай Божа чутая відзіць. — Прыказваюць, калі пачуюць добрую, хоць і мала праўдападобную навіну.
• Дай, Божа, яму свой занятак. — Зычуць таму, хто прычыніўся да разладу чужой сям'і, або цешыцца з чужой бяды.
• Дакажы славы. — Гэтак заахвочваюць выканаць цяжкую работу.
• Далі каляду. — Прыказваюць, калі некага без пары адправілі з работы ці звольнілі з працы.
• Далі паложыш - бліжэй возьміш. — Калі нейкую рэч прыхаваеш, дык у патрэбе хутчэй яе знойдзеш.
• Далі ў лес - болі дроў. — Гэтак перасьцерагаюць, каб нехта ня ўступаў у доўгія спрэчкі або каб не заводзіў справы ў судзе.
• Да нашага берагу нічога добрага ні прыплыве, - то трэска, то бруд. — Прыказваецца, калі малавартасны чалавек прыбудзе ў сям'ю, у суседзтва, або благі ўрадовец зьявіцца на грамадзкую працу.
• Да пары жбан ваду нося. — 1. Калі нешта старое паламалася. 2. Калі нехта памёр. 3. Калі зловяць злодзея, што доўга краў.
• Да Прачыстай памый, памяці, і пірапечаў напячы. — Прачыстая, або Спажа прыпадае 15 жніўня. Да гэтага часу жытняе жніва кончана, дык гаспадыні ёсьць час памыць бялізну й вычысьціць хату, ды ёсьць з чаго й перапечаў напячы, бо ёсьць мука новай уроды.
• Дараванаму каню ў зубы ні глядзяць. — Прыказваецца таму, хто прыглядаецца да дараванай ці знойдзенай рэчы, ці яна добрай якасьці.
• Дар за дар. — За зробленае дабро трэба адплаціцца дабром, або - за прычыненае ліха ліхам.
• Дар за дар, а дарма нічога. — Адплата строга па заслугах.
• Дарма й каза ваўку ні скача. Калі каза ваўку паскача, дык воўк яе зьесьць. — Прыказваюць таму, хто за зробленае дабро адплачвае злом свайму дабрадзею.
• Дарога ня сьпіць. — Прыказваюць таму, хто баіцца ночы адзін ехаць, ці йці ў дарогу, бо-ж на дарозе заўсёды знойдуцца падарожныя.
• Да Спаса (6 жніўня) сена сохня пад кустам, а пасьля Спаса ня хоча сохнуць і на кусьця. — Напамінак гаспадаром, што трэба старацца, каб да канца ліпеня сена было пакошана.
• Дасьць Бог дзень, дасьць і пажытак. — Для развагі таго, хто бядуе, як ён будзе жыць, калі пастарэе.
• Дасьць Бог доньку, дасьць Бог і дольку. — Прыказваюць бацьком, якія наракаюць, што ў іх родзяцца дочкі, а не сыны.
• Датуль маці міла, пакуль пяты мыла. — Упікаюць дзецям, якія ня хочуць дапамагаць старым бацьком.
• Даў-бы шэліг на малебін, дык самому патрэбін. — І на добрую справу ня можна аддаць таго, што пільна патрэбна сабе.
• Даў лататы. — Уцёк.
• Даў рады. — Справіўся з работай ці заданьнем.
• Даў таўкача. — Прыказваюць таму, хто стаўся пераможцам, для прыкладу: калі маладзейшы брат перш школу кончыў за старэйшага, ці калі перш ажаніўся або калі маладзейшая сястра перш замуж вышла.